نئی دہلی، 5/اکتوبر (ایس او نیوز /ایجنسی) سپریم کورٹ نے جمعہ کو تروملا تروپتی دیوستھانم (ٹی ٹی ڈی) میں لڈو کی تیاری میں استعمال ہونے والے گھی میں مبینہ طور پر جانوروں کی چربی ملانے کے الزامات کی تحقیقات کے لیے ایک آزاد خصوصی تحقیقاتی ٹیم (ایس آئی ٹی) تشکیل دینے کا حکم دیا۔ عدالت نے یہ اقدام عوامی مفاد کے تحت کیے گئے خدشات کے پیش نظر کیا ہے تاکہ اس تنازعے کی شفاف اور غیرجانبدارانہ جانچ ہوسکے۔

یہ ہدایت دیتے ہوئے جسٹس بی آر گوئی اور کے وی وشواناتھن کی بنچ نے کہا کہ ایس آئی ٹی میں سنٹرل بیورو آف انویسٹی گیشن (سی بی آئی) اور آندھرا پردیش پولیس کے دو دو افسران اور مرکزی حکومت کے ادارے فوڈ سیفٹی اینڈ اسٹینڈرڈ اتھارٹی آف انڈیا (ایف ایس ایس اے آئی) کا ایک سینئر افسر کو شامل کیا جائے گا۔

بنچ نے کہا “ہم نے اس کیس میں الزامات اور جوابی الزامات پر غور نہیں کیا ہے۔ صرف دنیا بھر کے کروڑوں عقیدت مندوں کے جذبات کو پرسکون کرنے کے لیے تفتیش کی یہ ہدایت دی گئی ہے۔‘‘بنچ نے کیس میں دائر کئی درخواستوں کی سماعت کرتے ہوئے کہا ’’ہم عدالت کو سیاسی میدان جنگ کے طور پر استعمال نہیں ہونے دیں گے۔‘‘